معلومة مهمة جدا أغلبنا لا يعلمها بخصوص سرعات الانترنت

 

السلام عليكم و رحمة الله و بركاته
في نقطة مهمة جدا حبيت أوضحها و أشاركها معاكم لأني لاحظت ان في ناس كتير مش عارفاها بصو يا رجالة ناس كتير بستغرب يعني ايه سرعة انترنت 2 ميجا ؟ و طبعا كلنا فاكرين ان المفروض ان دة معناه داونلوود 2 ميجابايت ؟ طب خدنا بالنا في اعلانات شركات الانترنت انو بيقولك نت يصل إلى 2 ميجا و يسكت يعني عمرو ما قال 2 ميجا بايت ؟
دة لأن المقصود بـ2 ميجا دي هوا "2 ميجابت وليس 2 ميجابايت" و البت (bit) أصغر من البايت (byte) طبعا زي محنا عارفين و للي مش عارفين الميجابايت يبقى 8 أضعاف الميجابت يعني من الآخر لو عايز تحسب سرعة داونلوود لاشتراك انترنت سرعة التحميل فيه 2 ميجابت يبقى تقسم على 8 و هيكون الناتج 0.25 ميجابايت أي ما يعادل 250 كيلوبايت تقريبا (نضرب في ألف لأن الميجا تساوي ألف كيلو أو 1024 بالتحديد) و دي حسبة مقربة بافتراض ان الميجا تساوي 1000 كيلو فقط لكن لو حسبتها ان الميجا تساوي 1024 كيلو و هذا هو الأصح هيكون الناتج بالضبط 256 كيلوبايت في الثانية.
حاجة اخيرة مهمة جدا بردو : رمز الميجابايت هو MB و رمز الميجابت هو Mb لاحظ الفرق في حرف الـb فهو في الميجابايت كابيتال و في الميجابت سمول. عشان كدة سرعة الانترنت بتكون 2 Mb أو 2 Mbps و ليس 2 MB أو 2MBps و المقصود بـps هنا هو per second أي في الثانية الواحدة.
تم ارفاق صورتين لتوضيح كلامي :- الصورة الأولى واخدها من الموقع الشهير Speedtest و هو موقع لاختبار سرعة الانترنت و الصورة دي واخدها من جهازي و انا اشتراك الانترنت عندي 2Mb. لاحظ هنا ازاي مكتوب 1.69 Mbps و ليس 1.69 MBps .. الصورة الثانية أنا جايبها من جوجل طبعا مش من عندي أكيد :D و لاحظ هنا مكتوب 6.282 MB/sec و ليس 6.282 Mb/sec (ما شاء الله اللهم لا حسد :D )
أتمنى أكون أفدتكم و أوضحت الفكرة و دمتم في رعاية الله و حفظه :)