اية معنى الرموز ® و © و TM؟

وشالفرق بينهم كلهم؟

تاريخياً بدت سالفة العلامات في عهد الامبراطورية الرومانية مع الحدادين اللي كانوا يطبعون رموز على سيوفهم وأسلحتهم لتمييز صانعها.
أولاً: الـ ®
اختصار حق كلمة مسجَلة – Registered (مسجَّلة الجيم مفتوحة، مو مكسورة يعني ستيريو حق الأشرطة يالمليق )، الرمز هذا يعني علامة أو ماركه تجارية مسجلة، ويحطونها -أو المفروض بس تنحط- يم الماركات المسجلة رسمياً في السوق. الرمز هذا يعني يقول لك ترى احنا مسجلين ولنا حقوق قانونية مدرجة تحت التسجيل هذا لحماية الهوية أوالعلامة.
شلون أسجل ماركتي اليديدة؟
يختلف من دولة لي دولة، بالكويت حسب معلوماتي لازم تروح وزارة التجارة والصناعة وتقدم طلب تسجيل علامة تجارية، شوف هالرابط فيه المتطلبات لتسجيل العلامة التجارية المحلية وهني الأجنبية وقبلها لازم يفحصون العلامة ويتأكدون انها مميزة عن العلامات الثانية ومناسبة للاستخدام في المجال المطلوب والسوق.
وانا ادوّر بقوقل ولا أطيح على ملف وورد فيه قانون العلامات التجارية الكويتي، الظاهر الملف من إعداد طالبة جامعية اسمها مشاعل الهاجري سنة 2006 أتمنى ما عندها مانع نعرض الملف هني دام متوفر في قوقل للعموم: لتنزيل الملف إضغط هني.
حسب ما قريت الظاهر لازم دايما يكون الرمز على جنب العلامة أو اسمها عاليمين، يعني ما يصير ينحط على الشعار أو داخله، من جذي نشوف الشعارات المشهورة يرسمونها وعلى يمينها فوق ولا تحت يحطون الرمز ®. هذا مثال لشعار ستاربكس:

   

 

ثانياً: الـ TM أو الـ ™
اختصار لكلمة علامة تجارية – Trademark، يستخدمونها لترويج المنتجات والسلع تحت علامات التجارية غــــير مــســـجـــلـــة! يعني رسمياً الشركة أو صاحب العلامة التجارية ما راح وسجّل ماركته في وزارة التجارة والصناعة، بس بحكم الفترة اللي استخدم فيها الماركة أو العلامة صار عنده قاعدة جماهيرية أو سمعه مرتبطة بهالشعار أو الماركه.
لما يحط يم اسمه أو على منتجاته الرمز هذا يعني يقول حق الناس ترى صج انا مو مسجل هالعلامة رسمياً بس إذا استغليتوها أو استخدمتوها أو قلّدتوها بأي شكل من الأشكال مستعد أقاضيكم وألاحقكم قانونياً ويا ويلكم ويلاااااه! يعني ديروا بالكم 
بس هالكلام كله مو يعني ترى صج عندهم حق، يمكن يطلع كلامهم غلط، يمكن قانونياً ما يقدرون يثبتون صحة كلامهم، يمكن العلامة أو الماركه تكون مخالفة بالأساس وما لها صورة قانونية بعد مراجعتها في الجهة الرسمية ويطيح الحق بالمطالبة فيها.
باختصار هذا رمز تحذيري لا غير.
الـTM رمز خاص بالمنتجات والسلع، يعني حق الأغراض الملموسة. أما الخدمات والشركات الخدمية – Service Providers يحطون يم اسمهم SM اختصار Service Mark. مثل شركة صيانة أو محاماة أو عيادة طبية..الخ.
متى أقدر أستخدم هالرمز؟
متى ما تحب، يالله هاك ™+Classico
ماكو قانون يمنع أحد من استخدام هالرمز، مثل ما قلت الغرض منه مثل تحذير مو أكثر. بس اذا تبي تستخدمه يقولون مشهور يحطونه فوق عاليمين مثل ما انا حطيته بالمثال فوق.
مثال ثاني شوفوا الـTM يم اسم Windows 7:

ثالثاً: الـ ©
اختصار كلمة حقوق الطبع والنشر – Copyright، يستخدمونه مع أي شي أصلي تألفه – Original work of authorship، مثل التصاميم، المواد المكتوبة، الصور، التماثيل والمنحوتات، …الخ. الغرض من استخدام هالرمز هو إعلان رغبتك بالحفاظ على حقوق الطبع والنشر وما يصير أحد ينقلهم من غير ما يستأذن.
طريقة الترتيب لازم تكون جذي:

© [Year of publication] [Your name]

إذا تطالعون تحت موقعي راح تشوفون:

انا حاطه يعني اقول يالتعبان انت وياه ياللي تنقلون مواضيعي وتدزونهم ايميلات من غير مصدر ترى انا مو راضي تباً لكم !

شلون أقدر أسجل حقوق الطبع والنشر؟
ماله داعي تسجيل، بس تحط الرمز على أي شي من تأليفك سواءاً قصة ولا مقالة ولا تدوينة ولا صورة ولا تصميم ..الخ وبس خلاص انت أعلنت عن حفاظك لحقوق الطبع والنشر لهذا العمل، ما يحتاج تروح جهة رسمية تسجل ولا شي. امبله في جهات رسمية لهالغرض تعطيك مزايا زياده بس بشكل عام مالها داعي.
بس ألّف وحط © ورووووح  مثال واقعي: من فترة كتبت في التويتر الحكمة الكُميلية المشهورة “ربعك مثل البطاط إذا كليتهم يخلصون” – © 2011 مهندس ابراهيم كامل
ديربالك ترى المفروض حتى لو ما تحط الرمز هم حقوق الطبع والنشر تكون مكفوله لك، بس الناس يحطون الرمز عشان يأكدون هالحق .
المصادر/
Patents101
Wikipedia
Grafikide